Sveitakeppni drengja 15 ára og yngri

Golfklúbbur Sauðárkróks sendi sveit vaskra drengja til keppni í Sveitakeppni Golfsambands Íslands í flokki 15 ára og yngri sem haldin var á Jaðarsvelli dagana 17.-19.ágúst s.l. Þeir sem skipuðu sveitina voru þeir Atli Freyr Rafnsson, Elvar Ingi Hjartarson, Hákon Ingi Rafnsson, Hlynur Freyr Einarsson, Jónas Már Kristjánsson og Pálmi Þórsson.  20 lið voru mætt til leiks í þessa keppni.  Fyrirkomulagið er þannig að fyrsta daginn er leikinn höggleikur sem ræður því í hvaða riðli sveitin keppir næstu tvo daga. Í hverri umferð eru 4 kylfingar sem spila en 2 hvíla.  Úrslitin úr höggleiknum voru þannig að Elvar Ingi lék á 78 höggum, Hlynur Freyr á 80 höggum og Jónas Már á 86 höggum og það voru þeirra skor sem töldu. Atli Freyr spilaði einnig í höggleiknum en hans skor taldi ekki, en í höggleiknum þá telja þrjú bestu skorin hjá hverri sveit. Eftir þennan hluta keppninnar vorum við í 8-9 sæti keppninnar en 4. maður sveitarinnar sem var jöfn okkur var á betra skori og því varð niðurstaðan sú að sveitin lenti í 9.sæti og því í C riðli, en 4 sveitir eru í hverjum riðli. Á laugardegi og sunnudegi var síðan fyrirkomulagið holukeppni þar sem leiknir eru 3 leikir í hverri umferð þ.e. tveir leikmenn úr hverri sveit spila svokallaðan fjórmenning og hinir tveir spila sinn hvorn tvímenningsleikinn.  Byrjað var á að spila við Nesklúbbinn og þar unnu Hlynur Freyr og Pálmi sinn leik í fjórmenningsleiknum en báðir tvímenningsleikirnir hjá Elvari Inga og Jónasi Má töpuðust.  Seinni leikurinn á laugardeginum var á móti Golfklúbbi Hveragerðis og þar sigrðaði Elvar Ingi í sínum leik en Atli Freyr tapaði í hinum tvímenningsleiknum, þá tapaðist einnig fjórmenningsleikurinn hjá Hlyni Frey og Hákoni Inga.  Báðir leikirnir þennan dag töpuðust því með einum vinningi gegn tveimur. Á sunnudeginum voru einnig spilaðar tvær umferðir.  Byrjað var á því að spila við nágranna okkar á Dalvík og Ólafsfirði sem voru með sameiginlega sveit.  Þessi leikur var klárlega sá besti af okkar hálfu í keppninni enda þekkjast kylfingar þessara sveita mjög vel.  Jónas Már og Atli Freyr spiluðu fjórmenninginn, en Elvar Ingi og Hlynur Freyr spiluðu sinn hvorn tvímenningsleikinn.  Allar viðureignir í þessum leik voru mjög spennandi en að lokum var landað sigri í öllum leikjunum.  Seinni leikurinn á sunnudeginum var gegn b sveit Golfklúbbs Akureyrar.  Þar léku í fjórmenningi þeir Atli Freyr og Pálmi, en í tvímenningnum léku þeir Hlynur Freyr og Elvar Ingi.  Í þessum leik var Hlynur Freyr sá eini sem landaði sigri en hinir leikirnir töpuðust.  Sveit GSS varð því í 14. sæti í þessari keppni.  Það var virkilega gaman að fylgjast með þessari keppni og allir keppendur voru að spila mjög vel og það er mikil sprenging í unglingagolfi um land allt.

Fjölmargar myndir úr æfingahring drengjanna er að finna hér á myndasíðunni

Uppskeruhátíð

Viljum bara minna á uppskeruhátíð golfskóla Golfklúbbs Sauðárkróks verður á morgun mánudaginn 20.ágúst kl.17:00 í golfskálanum.

 

Við viljum hvetja alla til að mæta – allir fá glaðning

 

Foreldrar eru hvattir til að mæta með börnunum

 

Meistaramót byrjenda

Meistarmót byrjenda GSS var haldið mánudaginn 13.ágúst á Hlíðarendavelli.  5 þátttakendur mættu til leiks að þessu sinni en það voru þau Helgi Hrannar Ingólfsson, Maríanna Ulriksen, Hildur Heba Einarsdóttir, Telma Ösp Einarsdóttir og Anna Karen Hjartardóttir.  Eftir skemmtilega keppni var það Telma Ösp sem stóð uppi sem sigurvegari, í öðru sæti varð Maríanna Ulriksen, í þriðja sæti varð Hildur Heba, fjórði varð síðan Helgi Hrannar og í því fimmta varð síðan Anna Karen.

Hægt er að sjá myndir frá verðlaunaafhendingu á myndasíðunni hér til hliðar

Byrjendamót og uppskeruhátíð

Vildi bara minna á að byrjendamót barna og unglinga verður haldið n.k. mánudag 13.ágúst og hefst kl.10:00.

Höggleikur verður leikinn í einum opnum flokki – 9 holur af rauðum teigum - og verðlaun fyrir 3 efstu sætin og jafnvel eitthvað meira…..

Gott væri að senda mér upplýsingar um skráningu í það – svo þarf að mæta a.m.k. kl.9:45.

Verðlaunaafhending verður að móti loknu.

 

Uppskeruhátíðin verður síðan mánudaginn 20.ágúst og hefst hún kl.17:00 í golfskálanum.

Við viljum hvetja alla sem hafa verið í golfskólanum í sumar að mæta því allir fá glaðning J

 

Svo er náttúrulega bongóblíða alla daga þó lognið mætti fara hægar yfir !

Það er því um að gera að spila og æfa eins og hægt er….

3.móti Norðurlandsmótaraðarinnar á Ólafsfirði lokið

3.mótið í Norðurlandsmótaröð barna og unglinga var haldið á Skeggjabrekkuvelli á Ólafsfirði þriðjudaginn 31.júlí - S1 mótið. Um 80 þáttakendur voru í þessu móti. Að venju fór hópur frá Golfklúbbi Sauðárkróks á mótið. Það voru þau Sigríður Eygló Unnarsdóttir, Aldís Ósk Unnarsdóttir, Hekla Kolbrún Sæmundsdóttir, Matthildur Kemp Guðnadóttir, Hildur Einarsdóttir, Thelma Einarsdóttir, Arnar Geir Hjartarson, Hlynur Freyr Einarsson, Pálmi Þórsson og Elvar Ingi Hjartarson. Þau stóðu sig öll mjög vel en til verðlauna unnu eftirfarandi: í flokkum 17-18 ára sigrðaði Arnar Geir Hjartarson og Sigríður Eygló Unnarsdóttir varð í 2.sæti. í flokki 15-16 ára varð Aldís Ósk Unnarsdóttir í 3.sæti og í flokki 14 ára og yngri sigraði Matthildur Kemp Guðnadóttir. Hægt er að sjá myndir hér á myndasíðunni. Þá er einnig búið að uppfæra stigagjöfina á síðu mótaraðarinnar nordurgolf.blog.is.  Síðasta mótið í mótaröðinni verður síðan á Akureyri sunnudaginn 2.september en þar verða jafnfram krýndir Norðurlandsmeistarar í öllum flokkum.

Einvígið barna og unglinga á Króknum

Einvígi ( shoot-out ) barna og unglinga hjá Golfklúbbi Sauðárkróks var haldið á Hlíðarendavelli fimmtudaginn 26.júlí.  Alls voru 12 þátttakendur í mótinu sem fór fram í ágætis veðri. Fyrirkomulagið er þannig að allir spila fyrstu brautina og sá sem slær flest höggin á henni dettur út en hinir halda áfram á næstu braut og síðan koll af kolli þar til einn stendur eftur. Verði 2 eða fleiri jafnir á hverri holu þá verða þeir að heyja einvígi sem getur verið langt pútt, vipp af löngu eða stuttu færi, högg úr sandglompu osfrv. Þau sem tóku þátt voru þau Hákon Ingi Rafnsson, Matthildur Kemp Guðnadóttir, Aldís Ósk Unnarsdóttir, Jónas Már Kristjánsson, Elvar Ingi Hjartarson, Pálmi Þórsson, Hekla Kolbrún Sæmundsdóttir, Arnar Freyr Guðmundsson, Maríanna Ulriksen, Jóhann Ulriksen, Arnar Ólafsson og Anna Karen Hjartardóttir.  Þetta er í fyrsta skiptið sem þetta mót er haldið en stefnt er að því að þetta verði árlegur viðburður hjá klúbbnum. Er skemmst frá því að segja að mótið var stórskemmtilegt og á síðustu holunni voru það þau Hekla Kolbrún Sæmundsdóttir og Elvar Ingi Hjartarson sem stóðu eftir.  Bæði áttu þau ágæt upphafshögg og Elvar sló fyrstur, var svona 10 metrum of stuttur frá flöt en Hekla sló frábært högg af um 150 metra færi og setti um 1,5 metra frá stöng og tryggði sér par á holunni og þar með sigurinn á mótinu.

Hægt er að sjá myndir af keppendum á myndasíðunni

Þriðja mótið í Norðurlandsmótaröðinni á Ólafsfirði - Opna S1 mótið

Þriðja mótið í Norðurlandsmótaröðinni - S1 mótið - verður á Ólafsfirði þriðjudaginn 31.júlí n.k.

Skráning er þegar hafin á golf.is en einnig er hægt að skrá sig í síma 863-0240 eða á netfangið [e-mail].

Nú er um að gera að fjölmenna á Ólafsfjörð

Vegna þessa móts fellur golfskólinn niður þennan dag.

Íslandsmóti unglinga í höggleik lokið

Fjórir kylfingar frá GSS fóru á Íslandsmót unglinga í höggleik sem haldið var á hinum stórskemmtilega Kiðjabergsvelli í Grímsnesi dagana 20.-22.júlí s.l. Í flokkum 14 ára og yngri kepptu þau Matthildur Kemp Guðnadóttir og Elvar Ingi Hjartarson. Í flokki 15-16 ára keppti Aldís Ósk Unnarsdóttir. Í flokki 17-18 ára keppti síðan Arnar Geir Hjartarson. Leiknar voru 18 holur á dag - samtals 54 holur og voru þáttakendur alls 147 í öllum flokkum. Elsti flokkur stráka spilaði á hvítum teigum, 15-16 ára stúlkurá bláum teigum en 14 ára og yngri stúlkur á rauðum teigum en flokkur 14 ára og yngri drengja spilaði á bláum teigum. Veðrið fyrstu tvo dagana var ljómandi gott en á sunnudeginum rættust allar veðurspár því miður og brast á með miklu roki og rigningu sem stóð yfir allan daginn. Völlurinn varð því mjög þungur og fljótlega mynduðust tjarnir á brautum vatn flæddi niður þær brautir sem hölluðu undan brekkunum. En allir kylfingarnir kláruðu mótið og eiga heiður skilið fyrir það miðað við hinar ótrúlegu aðstæður.
Matthildur varð í 11. sæti af 14 keppendum í sínum flokki. Elvar Ingi varð í 24.sæti af 36 keppendum. Aldís varð í 13.sæti af 16 keppendum. Arnar Geir varð síðan í 8.sæti af 30 keppendum í hans flokki.

Öll úrslit úr mótinu er síðan hægt að sjá á http://www.golf.is/

Meistaramóti barna og unglinga lokið

Meistaramót barna og unglinga GSS var haldið dagana 9-11 júlí s.l.

Keppt var í ýmsum flokkum og spiluðu 14 ára og eldri 54 holur en 12 ára flokkurinn spilaði 27 holur.

Hægt er að sjá myndir frá verðlaunaafhendingunni á myndasíðunni hér til hliðar.

Úrslit urðu þessi:

Drengir 12 ára og yngri:
1.Hákon Ingi Rafnsson	144 högg
2.Viktor Kárason	206 högg
Drengir 14 ára og yngri:
1.Elvar Ingi Hjartarson	250 högg
2.Pálmi Þórsson	287 högg
Stúlkur 15-16 ára:
1.Aldís Ósk Unnarsdóttir	279 högg
2.Hekla Kolbrún Sæmundsdóttir	288 högg
3.Matthildur Kemp Guðnadóttir	289 högg
Drengir 15-16 ára:
1.Hlynur Freyr Einarsson	245 högg
2.Atli Freyr Rafnsson	269 högg
3.Jónas Már Kristjánsson	276 högg
Drengir 17-18 ára:
1.Arnar Geir Hjartarson	236 högg
2.Þröstur Kárason	293 högg

Meistaramót barna-og unglinga

Meistaramót barna-og unglinga GSS

Verður haldið 9.-11. júlí n.k.

Mótið er kynja-og aldursskipt.

Keppt verður í eftirtöldum flokkum

17-18 ára stúlkur – rauðir teigar - 54 holur

17-18 ára drengir – gulir teigar – 54 holur

15-16 ára stúlkur – rauðir teigar - 54 holur

15-16 ára drengir – gulir teigar - 54 holur

14 ára og yngri stúlkur – rauðir teigar - 54 holur

14 ára og yngri drengir – rauðir teigar - 54 holur

12 ára og yngri stúlkur – rauðir teigar – 27 holur

12 ára og yngri drengir – rauðir teigar – 27 holur

Byrjendur – stúlkur – rauðir teigar – 18 holur

Byrjendur – drengir – rauðir teigar – 18 holur

Gert er ráð fyrir að 12 ára og yngri flokkarnir spili frá kl.10 keppnisdagana.

Byrjendaflokkar spili þriðjudag 10.júlí (9) og miðvikudag 11.júlí (9)

Eldri flokkar spila eftir hádegi og finna sér rástíma fyrsta daginn.

Leyfilegt er að eldri flokkar spili saman fyrsta dag en hina tvo verður ræst út eftir besta skori.

Hægt er að skrá sig á www.golf.is eða í golfskálanum

Verðlaunaafhending verður síðan á miðvikudaginn í mótslok.