Opið barna- og unglingamót á Akureyri - muna að skrá sig!

Við viljum minna á að nauðsynlegt er að skrá sig í barna- og unglingamótið á Akureyri sunnudaginn 31. ágúst n.k. Upplýsingar um mótið má sjá neðar á síðunni, en hægt er að skrá sig í netfangið [e-mail]. Það er mikilvægt fyrir alla að taka þátt í mótinu og fá reynslu af því að spila á Jaðarsvelli, einum af bestu golfvöllum landsins. Nauðsynlegt er að skrá sig fyrir þriðjudaginn 26. ágúst n.k.

Sveitakeppni 16 ára og yngri drengja á Flúðum - Dagur 3

Ennþá heldur fjörið áfram. Í morgun léku okkar menn við GL-B og unnu sigur í tveimur leikjum en einn tapaðist. Þorbergur vann sinn leik 4/3, Arnar Geir vann sinn leik 2/1 og í fjórmenningnum töpuðu Jónas og Ingi 5/4.  Þessi niðurstaða hjá okkur í morgun verður til þess að við spilum um 13.sætið við Akureyringa ( GA ). Leikirnir hefjast kl.13.24.

Kveðjur frá Flúðum                                                                         

Kl.12.50 / Hjörtur

 Þá er leiknum við Akureyringa lokið. Þetta var æsispennandi viðureign og miklar sveiflur.  Fjórmenningurinn vannst 4/3 og þeir Jónas og Þröstur fóru á kostum.  Arnar Geir tapaði sínum tvímenningsleik 5/4 í hörkuleik. Þetta réðist því allt í lokaleiknum þar sem að Tobbi spilaði.  Þessu leikur endaði í bráðana eftir að Tobbi hafði snemma lent tveimur holum undir á seinni hring en náð að jafna. En að lokum fór það þannig að Tobbi tapaði á 19 holu í stórskemmtilegum leik.

Niðurstaðan var því að við enduðum í 14. sæti.  Í heildina fóru menn því bara nokkuð sáttir og þreyttir heim og skemmtilegir dagar eru að baki.  Það er því bara að spýta í lófana og gera enn betur að ári. Við erum með unga stráka sem að eiga mörg ár eftir í þessum flokki og voru í flestum tilfellum að spila við sér mun eldri andstæðinga og fleiri bíða við hornið og banka á dyrnar til að komast í sveitakeppnina.  Vonandi verðum við komnir með það breiðan hóp á næsta ári að við náum að senda tvær sveitir og jafnvel telpnasveit líka - hver veit

Það var margt skemmtilegt við þessa daga. Strákarnir voru sínum klúbbi til sóma bæði á vellinum og utan hans. Framkoman til fyrirmyndar. Snyrtilega klæddir í nýjum peysunum og mikil gleði allt í kringum okkar.  Svo komu foreldrar og drógu fyrir sína stráka sem var mjög skemmtilegt því að það var um langan veg að fara. Svona stuðningur skiptir líka mjög miklu máli.

Gistingin á Syðra Langholti var líka algjör snilld og þar var mikið stuð !

Sauðárkróki 17.08.08 kl.23.00 / Hjörtur

 

Sveitakeppni 16 ára og yngri drengja á Flúðum - Dagur 2

2.dagur í sveitakeppninni stendur nú yfir og eru leikir í 1.umferð að klárast.  GSS lék við GKJ-B og tapaði 2-1. Leikirnir fóru þannig að Þorbergur sigraði í sínum leik á 18.holu 1/0, Arnar Geir tapaði á 18.holu 1/0 og Jónas og Ingi sem að spiluðu fjórmenninginn töpuðu 4/3. Strákarnir voru að spila ágætis golf í dag og hefði sigurinn sannarlega getið dottið okkar megin en pútterinn var "kaldur" en slátturinn var mjög góður.  Á eftir spilum við síðan við GV-A og þar mætum við hörku spilurum með mjög lága forgjöf.

Bless í bili frá Flúðum

Kl. 12.55 / Hjörtur

Seinni umferð dagsins var að ljúka.  Eins og okkur grunaði þá var þetta okkar mönnum erfitt þar sem að A sveit Vestmannaeyinga er skipuð hörku kylfingum.  Leikirnir töpuðust allir.  Þorbergur og Arnar Geir töpuðu báðir 4/3 í tvímenningsleikjum sínum og fjórmenningurinn hjá Inga og Þresti tapaðist 3/2.  Á morgun verður spilað við GL-B.

Þrátt fyrir að báðir leikir dagsins hafi tapast er mjög góð stemming í hópnum og nú förum við heim að Syðra-Langholti og slöppum af hjá þeim heiðurshjónum Hrafnhildi og Jóhannesi. Skellum okkur í heita pottinn og svo verður farið snemma í háttinn því að fyrsti rástími í fyrramálið er kl.8.18.  Ekki liggur fyrir ennþá við hverja við spilum síðan í seinni umferðinni á morgun - sunnudag.

Meiri fréttir á morgun frá Flúðum

Kl.19.15 / Hjörtur

Sveitakeppni 16 ára og yngri drengja á Flúðum - Dagur 1

1.umferð í sveitakeppni drengja 16 ára og yngri er í gangi þessa stundina. Sveit GSS hefur lokið leik í dag. Ekki er ljóst á þessari stundu í hvaða sæti sveitin er að loknum höggleiknum þar sem fjölmargir eru ennþá að spila. En hérna koma óstaðfestar tölur hjá sveitinni. Arnar Geir lék á 88 höggum, Þorbergur á 92 höggum, Jónas á 99 höggum og Þröstur á 108 höggum. Ingi hvíldi í dag. Þrjú bestu skorin telja síðan í heildarkeppninni. Nánari fréttir koma síðar í dag. 

15.08.08 / kl. 14.55 / Hjörtur

Niðurstaða dagsins er 14 sæti af 20 sveitum.

Á morgun hefst síðan holukeppnin og þá spilum við á móti GKJ-B og síðan eftir hádegið er það GV-A.

Meiri fréttir á morgun

Bestu kveðjur frá Flúðum

15.08.08 / kl.19.10 / Hjörtur

 

Golfmót á Akureyri

Sunnudaginn 31 ágúst n.k. er fyrirhugað að halda barna- og unglingamót á Akureyri. Mótið verður með svipuðu sniði og Nýprent Open mótið og Intersportmótið á Dalvík. GSS sér um skráningu á sínum félagsmönnum og eru áhugasamir beðnir um að láta vita um þátttöku í netfangið [e-mail]

Mikilvægt er að láta vita eins fjótt og hægt er, hverjir ætla að fara á mótið og er æskilegt að foreldrar fari með. 

Mótið er frábært tækifæri fyrir krakkana til að spila á stærsta vellinum Norðanlands og þar sem Jaðarsvöllur er 18 holur, þá mun mótið væntanlega taka styttri tíma en mótin á Sauðárkróki og Dalvík.

 Byrjað verður að ræsa út  kl: 10:00

Mótsgjald er 1.200. Vegleg verðlaun verða veitt í öllum flokkum. Að móti loknu verður pizzahlaðborð.

Fertugur og flottur

Akureyringinn Ólafur Auðunn Gylfason er þjálfarinn okkar. Ólafur hefur reynst mikill happafengur fyrir Golfklúbb Sauðárkróks, enda góður þjálfari og félagi. 

Til marks um áhugann lét hann fertugsafmælið ekki tefja sig frá golfkennslunni. Eftir að krakkarnir höfðu sungið afmælissönginn, var haldið til æfinga að venju.

Þó formlegar golfæfingar séu hættar nú í sumar mun Óli fylgja sveit GSS að Flúðum og vera þeim til halds og trausts um helgina.

Sveitakeppni unglinga

GSS sendir eina sveit í sveitakeppni unglinga þetta árið. Fyrirhugað var að senda tvær sveitir, en vegna stórhertra reglna GSÍ var það ekki mögulegt að þessu sinni. Sveit GSS skipa eftirtaldir.

Ingvi Þór Óskarsson

Þorbergur Ólafsson

Arnar Geir Hjartarson

Jónas Rafn Sigurjónsson

Ingi Pétursson

Þröstur Kárason

Mótið fer að þessu sinni fram á Flúðum 15-17. ágúst. Reynt verður að birta úrslit hér á síðunni jafnóðum.

Opna Intersportmótið á Dalvík

Opna Intersportmótið var haldið á Dalvík fimmtudaginn 7. ágúst s.l. í þurru og fremur köldu veðri. Krakkarnir okkar stóðu sig með mikilli prýði og miklu betur en gera mátti ráð fyrir, enda flestir að spila völlinn í fyrsta skipti. Alls kepptu 15 krakkar úr GSS í mótinu og voru öll til fyrirmyndar. Þökkum við Dalvíkingum fyrir góðar móttökur og skemmtilegt mót.

 

Í flokki 10-11 ára drengja kepptu 6 strákar úr GSS. Jafnir í 1-2 sæti urðu Arnar Ólafsson og Elvar Ingi Hjartarson en þeir spiluðu á 3 höggum yfir pari vallarins. Jóhannes Friðrik Ingimundarsson varð þriðji á 8 höggum yfir pari vallarins. Voru því keppendur úr GSS í þremur efstu sætum í þessum flokki, en 19 strákar tóku þátt í keppninni. Stúlknaflokkinn í sama aldurhópi sigraði Hekla Kolbrún Sæmundsdóttir GSS með yfirburðum, spilaði á 7 höggum yfir pari vallarins. Í öðru sæti varð Matthildur Guðnadóttir en alls tóku 6 stelpur þátt í þessum flokki. Krakkarnir kepptu allir á barnateigum, sem voru staðsettir inn á brautum og fannst sumum keppendum okkar völlurinn vera full auðveldur, enda vanir að spila af rauðum teigum heima á Hlíðarenda.

 

Í flokki 12-13 ára stráka var aðeins einn keppandi frá GSS, Arnar Geir Hjartarsson og sigraði hann með yfirburðum í flokknum, spilaði á 87 höggum af rauðum teigum. Spilaði hann á 19 höggum færri en næsti maður, en alls voru 15 keppendur í flokknum. Tvær stelpur úr GSS, Elísabet Ásmundsdóttir og Sigríður Eygló Unnarsdóttir kepptu í kvennaflokknum og stóðu sig vel. Varð Elísabet í fjórða sæti af átta keppendum, en fékk fyrstu verðlaun í flokki með forgjöf.

 

Í flokki 14-15 ára stráka kepptu 3 strákar frá GSS og stóðu sig vel, þótt þeir ynnu ekki til verðlauna og Helga Pétursdóttir keppti í kvennaflokknum og varð í öðru sæti, en keppendur voru reyndar aðeins tveir í þeim flokki.

 

Rætt hefur verið um að stofna til mótaraðar á Norðurlandi, þar sem klúbbarnir tæku sig saman um að halda mót. Hluti af þeirri mótaröð yrðu mótin á Sauðárkróki, Dalvík og Akureyri og einnig hugsanlega á Húsavík. Næsta sumar gæti því orðið spennandi fyrir krakka í golfi á Norðurlandi.

Stórmót sumarsins – Nýprent Open

 

Um 70 krakkar úr fimm golfklúbbum mættu til leiks á Nýprent Open á Hlíðarendavellli þann 19. júlí s.l. í frábæru veðri. Krakkarnir skemmtu sér hið besta, enda varla annað hægt. Helstu styrktaraðilar mótsins voru Nýprent, Golfbúðin í Hafnarfirði, Hótel Vík og Kaupfélag Skagfirðinga. Styrktaraðilum og öðrum þeim sem unnu að mótinu eru færðar bestu þakkir. Helstu úrslit voru:

 

9 ára og yngri stúlkur – 9 holur

1.      Guðrún Fema Sigurbjörnsdóttir GÓ

2.      Magnea Helga Guðmundsdóttir GHD

 

9 ára og yngri strákar – 9 holur

1.      Kristján Benedikt Sveinsson GA

2.      Þorgeir Örn Sigurbjörnsson GÓ

3.      Kristinn Jóhann Traustason GÓ

 

10-11 ára stúlkur – 9 holur

1.      Matthildur Guðnadóttir GSS

2.      Linda Þórdís Róbertsdóttir GSS

3.      Aldís Ósk Unnarsdóttir GSS

 

10-11 ára strákar – 9 holur

1.      Atli Freyr Rafnsson GSS

2.      Elvar Ingi Hjartarsson GSS

3.      Jónas Már Kristjánsson GSS

 

12-13 ára stúlkur 18 holur

1.      Elísabet Ásmundsdóttir GSS

2.      Sigríður Eygló Unnarsdóttir GSS

3.      Jónína Guðmundsdóttir GHD

 

12-13 ára strákar 18 holur

1.      Símon Leví Héðinsson GOS

2.      Arnar Geir Hjartarson GSS

3.      Arnór Snær Guðmundsson GHD

 

14-15 ára stúlkur – 18 holur

1.      Brynja Sigurðardóttir GÓ

2.      Vaka Arnþórsdóttir GHD

3.      Helga Pétursdóttir GSS

 

14-15 ára strákar – 18 holur

1.      Ingvi Þór Óskarsson GSS

2.      Ingi Pétursson GSS

3.      Jónas Rafn Sigurjónsson GSS

Úrslit í Meistaramóti GSS - yngri flokkar

Úrslit í Meistaramóti GSS – yngri flokkar 

Góð þátttaka var í meistaramóti GSS í yngri flokkum og hart barist um sigurinn. Þeir sem voru orðnir 12 ára og eldri spiluðu 18 holur í þrjá daga en þeir yngri 9 holur í þrjá daga.

 Unglingaflokkur

piltar

1.      Arnar Geir Hjartarson 183 högg

2.      Jónas Rafn Sigurjónsson 195 högg

3.      Ingi Pétursson 204

 

stúlkur

1.      Sigríður Eygló Unnarsdóttir 225 högg

2.      Elísabet Ásmundsdóttir 246 högg

 Barnaflokkur 

piltar

1.      Elvar Ingi Hjartarson 106 högg

2.      Atli Freyr Rafnsson 110 högg

3.      Jóhannes Friðrik Ingimundarson 113 högg

 

stúlkur

1.      Hekla Kolbrún Sæmundsdóttir 134 högg

2.      Aldís Ósk Unnarsdóttir 147 högg

3.      Matthildur Guðnadóttir 149 högg